Euskal Herriko MGIko Eva Perez-Ponsen kronika.
Joan den ekainaren 16an, Mer Gómezekin batera, gezurtatu ahal izan genituen intersex pertsonei buruz dauden mitoetako batzuk. Horretarako, lehenengo galderarekin hasi ginen: zer da intersexualitatea? Bada, intersex pertsonak maskulinitatearen eta feminitatearen bi arketipoekin bat ez datozen ezaugarri sexualekin jaio diren pertsonak dira. Eta garrantzitsuena, ez dago intersexualitate mota bakarra. Arketipoak agintzen du emakumeek xx kromosomak izan behar dituztela, eta hormonen gehiengoa estrogenoak izan behar dutela, gonadak obuluak izan behar dutela eta genitalitatea, berriz, klitoria. Gizonek, berriz, xy kromosomak, testosterona, barrabilak eta zakila.
Arazoa estetikoki desiragarria den genitalitatea mutilatzea agintzen duen gizarte bitar batetik sortzen da. Hain barneratuta daukagu gizon eta emakume kategoriak baino ez daudela, ezen intersex haurtxo bat jaiotzen denean, arrazoi estetiko hutsagatik, baimenik gabe mutilatzen baita, ziseteronormaren iruditerian txerta dadin. Hori dela eta, protokoloz egiten diren esku-hartzeak debekatzea da intersex pertsonen borroketako bat, hau da, ebakuntza egitearen arrazoi bakarra estetikoa denean, eta horrekin batera, identitate-agirietan “sexu” kategoria ezabatzea. Azken hori garrantzitsua da, izan ere, gaur egun premia legal bat dago, haurrak gizon edo emakume gisa sailkatu behar direlako (erregistroan sartu behar da) jaio eta 48 ordura; hor, aparatu medikoak eta legegileak eskutik jarduten dute. Eskaria argia da: kontua ez da erregistratzeko denbora luzatzea, zisarautik urruntzen diren pertsona guztiei hainbeste kalte egiten dien “sexu” kategoria kentzea baizik.
Merrek kontatzen zigun intersexualitateek zerikusia dutela gorputzarekin, baina baita desioarekin, sexualitatearekin eta generoarekin ere; intersex gorputza praktika heteronormatibo zehatz batera egokitzen saiatzen da medikoki, desira homo edo bisexualari aukerarik eman gabe. Hortik LGTB mugimenduaren parte izateko borroka. Era berean, ez dute hirugarren sexua aldarrikatzen. Horrek ez du baztertzen identitate ez-bitarraren aldeko borrokarekin bat egiten ez dutenik, haien buruak gizon eta emakume gisa aldarrikatzeaz gain.