Heteropatriarkatu kapitaliztari planto. Bizitzak erdigunean.

MGI-ISF elkarteak martxoaren 8ko grebarekin bat egingo du.

Mugarik Gabeko Ingeniaritza – Ingeniería Sin Fronteras elkarteko emakumeok martxoaren 8an gure zereginak egiteari utziko diegu eta kaleak hartuko ditugu greba feministara batuz, heteropatriarkatu kapitalistaren kontra egiteko.

Bizitza erdigunean jarri nahi dugu, bizitza duinak eramateko eskubidea eta emakume* gisa burujabe izatea ukatzen digun indarkeriaren, ezberdintasunaren, prekarietatearen, kontsumo-ereduaren eta esplotazio kapitalista, patriarkal eta arrazistaren kontra egiteko.

Lanaren zatiketa sexualaren, etxeko lanen ikusgarritasun ezaren eta sozialki eta instituzionalki inolako balio ekonomikorik ez duten erreprodukzio eta zaintza lanen aurrean, aitortza eta erantzukizun instituzionala aldarrikatzen dugu, justuagoa, bidezkoagoa eta iraunkorragoa den sistema bat lortzeko.

Sexualitate-eredu hegemonikoen, pertsona transen patologizazioaren, heteroarauaren, lesbofobiaren, edertasun canon-aren eta beste menderakuntzen aurrean, denontzako eskubide zibil berberak aldarrikatzen ditugu.

Greba egingo dugu bizitza jasangarriak nahi ditugulako. Horretarako, bizitzaren sostengatzearen gainean erantzukizun kolektiboa aldarrikatzen dugu.

Indarkeria matxistarik eta heteroaraurik gabeko bizitzak nahi ditugulako, aldarrikatzen dugu sinetsiko gaituen eta gure hitza zalantzan jarriko ez duen justizia, lege eta botere publikoan oinarritutako sistema-eredua.

Arrazakeriarik eta kolonialismorik gabeko bizitzak nahi ditugulako, inor ez dela ilegala aldarrikatzen dugu. Guztiontzako eskubide guztiak.

Ingeniaritza Eskolan egiten dugun lana dela eta, MGI-ISF-k greban parte hartuko du, aurrez aipaturiko gai guztiez gain, gure fakultateetako hezkuntza planak guztiz androzentrikoak direlako, gizonetan eta gizonezkoetan zentraturikoak. Hori dela eta, zientzia eta teknologian emakumeak ikusaraztea eskatzen dugu.

Euskal Herrian eta El Salvadorren lanean gabiltzan langileak grebara batuko gara eta martxoaren 8an ez dugu kotizatuko.

Lan, hezkuntza, kontsumo eta zaintza greba egingo dugu jendarte libre, iraultzaile eta feminista baten alde.

Bizitzak erdigunean!

Informazio gehiago hemen.

Erauzketaren aurka

Ekozinemaldiaren 13. edizioan hegoaldeko ahots bat izango dugu.

Planetak pairatzen duen ingurumen krisia baliabide naturalen predatzailea eta ezberdintasunen sortzailea den ekoizpen-, truke- eta kontsumo-eredu globalizatuaren emaitza da. Lehiakortasuna, indibidualismo eta amaigabeko kontsumismoan oinarrituriko eredua. Horren adierazgarri dira Amazoniako milioika hektareatako ustiapen baimenak, energia eta mea baliabideetara heltzeko Venezuelan garatu daitekeen kontu-hartze militarra, Brasilen meatzaritza arduragabeagatik gertaturiko beste hondamendi bat, Kolonbiako urtegirik handienaren proiektuak sorturiko lekualdatzeak eta pobrezia Cauca ibaian ingurugiro hondamendia izateko zorian jarriz, edota Laos, Kenya, Afganistan eta Birmanian aurreko urtean izandako hondamendiak.

Honi batu behar zaio erauzketaren aurrerakadari paraleloki doan errepresioaren fenomenoa, irabazi ekonomiko handiagoen eta berme gutxiagokoen kasuan, proiektu horien aurka dabiltzan aktibisten erailketak jazoz. 2018an 321 aktibistaren erailketak zenbatu dira, %75 ingurumenaren defendatzaileak izanik.

Gertu zein urrun izan arren, planetari eragiten dioten arazoak begirada global batez ezagutzeko, inspiratzeko eta elkartasuna adierazteko asmoarekin, Ekozinemaldiaren 13. edizioa dugu laster. Ekologistak Martxan eta Mugarik Gabeko Ingeniaritza/Ingeniería sin Fronteras (MGI-ISF) erakundeekin, beste eragile batzuekin elkarlanean, antolaturiko zor ekologikoa eta zine festibala, Euskal Herriko 13 herri eta hirietan burutuko da, martxoaren 25etik 31ra. Hemen duzu programa osoa.

Edizio honetan, hegoaldeko ahotsa dakarkigun Vidalina Morales komunitateko liderra eta ingurugiro defendatzailea izango dugu, El Salvadorren metalen meatzaritzaren aurkako mugimenduko borrokako kidea, herrialde honetan industria eredu honen debekua lortu zutelarik.

Vidalina Morales El Salvadorren ustiapen baimen eske zebiltzan meatzaritza proiektuei aurre egiten hasi zen hasieratik. Kalteturiko komunitateak hamarkada luzez borrokatu ostean jarduera hau debekatzen duen mundu mailako lehenengoa eta bakarra den legearen onespena Latinoamerikako aparteko gertaera izan da.

Borroka prozesu honen berri ematen digun “No tenemos miedo” dokumentala, Vidalina Morales protagonista duen ikus-entzunezko erreportajea da, El Salvadorreko Asociación de Desarrollo Económico Social (ADES) erakundeak Colectivo de Comunicación Popular eragilearekin koordinazioan ekoizturikoa. Dokumentalak Ekozinemaldian 2019ko programazioan izango dugu, eta emanaldien osteko solasaldietan protagonistak berak parte hartuko du.

Euskal Herrira Vidalina Moralesek egingo duen bisitaren helburua lurraldearen eta Giza Eskubideen defentsan El Salvadorreko emakumeek egiten duten lanari buruzko ezagutza izatea da, beste lurralde batzuetako erresistentzientzako inspirazio moduan. Herrien artean errealitate eta borroka hauek elkarbanatzea elkartasun eta erresistentziak sustatzeko tresna dira.

Aukera hau ere baliagarri izango zaigu El Salvadorreko errealitatearen eta beste borroka batzuen egoeraren berri izateko, hala nola, gaur egunean estatu horretan abortuaren zigorgabetasunerako eta uraren pribatizazioen aurkako erronkei buruz mintzatzeko.

ISF-MGI-ek Vidalina Moralesen Euskal Herriko bira honetan parte-hartuko du:

  • Donostia. Martxoaren 25ean, astelehena, goizeko 11etan dokumentalaren emanaldia eta solasaldia UPV/EHU-ko Ingeniaritza Eskolan, eta arratsaldeko 7.30etan Koldo Mitxelena kulturgunean.
  • Leioa. Martxoaren 26an, asteartea, eguerdiko 12.30etan dokumentalaren emanaldia eta solasaldia UPV/EHU-ko Arte Ederren Fakultatean.
  • Bilbo. Martxoaren 26an, asteartea, arratsaldeko 6etan dokumentalaren emanaldia eta solasaldia Bilborock aretoan Silvia Federici ekintzaile feminista eta “Caliban eta sorgina” liburuaren idazlearekin batera.
  • Tolosa. Martxoaren 27an, asteazkena, arratsaldeko 7.30etan dokumentalaren emanaldia eta solasaldia Leidor zineman.
  • Bilbo. Martxoaren 28an, osteguna, arratsaldeko 5etan dokumentalaren emanaldia eta solasaldia UPV/EHU-ko Bilboko Ingeniaritza Eskolan.
  • Basauri. Martxoaren 29an, ostirala, arratsaldeko 7etan, dokumentalaren emanaldia eta solasaldia Marienea – Emakumeen Etxean.

ARGAZKI LEHIAKETA: Emakumeak estereotipoak apurtzen Euskal Herrian

Emakumeek oraindik oztopo asko aurkitzen ditugun gizarte batean bizi gara. MGItik genero estereotipo hauek gainditzen dituzten emakumeak ikustarazi nahi ditugu, eta horretarako argazki erakusketa bat prestatu dugu.

Parte har ezazu “Euskal Herrian estereotipoak apurtzen” argazki lehiaketan, estereotipo hauek erakusten digutenaren irudi bat bidaliz info.bilbao at euskadi.isf.es e-posta helbidera otsailak 24 baino lehen!

Lehiaketaren oinarriak hemen:

Bidali  

  1. Irudia: Argazkia JPG formatuan, 72 puntu hazbesteko (dpi) bereizmenarekin eta DINA A2 neurriarekin, horizontalean edo bertikalean.
  2. Izena emateko orria: Webguneko izena emateko orria beteta.

Saria    

Lehiaketako 6 argazkiren egileen artean 50 €ko balioa duten otzarak + ISF-MGI-ko materialak (kamiseta, pendrive, liburuak etb) banatuko dira.

Baldintzak  

  • Parte hartzaile bakoitzak gehienez lan bat aurkeztu dezake.
  • Argazki sarituak ISF-MGI-k eta El Salvadorreko emakume antolatuek egindako “Mujeres en la defensa del territorio y los DDHH y ruptura de estereotipos” erakusketa osatuko dute.
  • Lanak originalak izan behar dute.
  • Epaimahaiak lehiaketa hutsik geratzen dela adostu dezake bidaltzen diren lanen kalitatea nahikoa ez bada.
  • Lehiaketa honetako parte hartzaileak testuen, argazkien eta bideoen argitalpenerako baldintzak onartzen dituzte.
  • Edozein zalantza izanez gero honako helbide honetara idatzi dezakezu: info.bilbao@euskadi.isf.es
  • Epaimahaiak lanen originaltasuna eta ISF-MGI-k diharduen lanarekiko lotura baloratuko du.

Lanak aurkezteko epea:  2019ko otsailaren 24a baino lehen, honako helbide elektronikora info.bilbao at euskadi.isf.es, mezuaren izenburuan Argazkia adieraziz.

ZIENTZIA, TEKNOLOGIA ETA GIZARTEA. Hegoa Institutuaren graduondoko ikasketetan buruturiko Giza Garapenerako Teknologien inguruko saioa

Askotan zientzia eta teknologia neutraltasun gune gisa eta ideologiarik gabekotzat aurkezten dira. Zeinbaterainokoa da Ipar eta Hego Globalen artean teknologiaren erabileraren aldea? Nola gauzatzen dute emakumeek eta gizonek teknologiaren erabilera eta kontrola?

Galdera hauek jorratzeko, Ingeniería Sin Fronteras – Mugarik Gabeko Ingeniaritza (ISF-MGI) erakundeak pasadan asteartean, urtarrilaren 15ean, Hegoa Institutuaren Garapena eta Nazioarteko Lankidetza eta Globalizazioa eta Garapena masterreko ikaslegoari zuzenduriko saio bat burutu zuen. Bertan zientzia eta teknologiak bizigarri diren bizitzak posible izateko duten eraginaren inguruko hausnarketa proposatu genuen.

Hamabost bat gazte hurbildu ziren ordu pare bat iraun zuen saiora, eta topaketa eta hizketa gune bat garatu genuen Giza Garapenerako Teknologien eginkizuna eta gure erakundeak zientzia eta teknologia bizitzaren zerbitzura jartzeko egiten duen lanaren inguruan eztabaidatuz.

Horrez gain, hausnarketen gehiengoak Giza Garapenerako Teknologietan perspektiba feminista txertatzearen eta honen zeharkakotasuna garatzearen garrantziari buruzkoak izan ziren, eta horretarako hiru dimentsioetan zehar (proiektuarena, kolektiboarena eta pertsonala) erakundean gauzatutako praktika feministen adibide ezberdinak erabili genituen.

Espazio oso aberasgarria izan zen eta espero dugu hausnarketa kritikorako eta ISF-MGI erakundean, praktiken bidez edota bolondres gisa, partehartzeko interesa piztu izana.

Garapenerako lankidetzaren alorrean eta GrALen kudeaketan diharduten irakasle eta ikerlariei zuzendutako Aktibista eskola

Garapenerako lankidetza eta gizarte eraldaketaren inguruko ezagutza eta erremintak elkartrukatzeko espazioa da Aktibista eskola. Gaiotan interesa duen irakasle eta ikerlari orori zuzenduta dago, eta uste hau du oinarrian: injustizia sozialen inguruko kontzientzia kritikoa sortu beharra dago (tokiko mailan zein maila globalean, Hego eta Ipar ikuspegiarekin), Unibertsitatetik injustizia horiei aurre egingo badiegu.

 

2019an zehar garatuko da, hainbat kolektibo eta pertsonak emago dituzten 2 orduko iraupeneko 9 saiotan banatuta. Saiootan genero parekidetasunarekin lotutako gaiak jorratuko dira nagusiki, metodologia parte-hartzaileak eta hausnarketa-ekintzazkoak erabiliz. Parte-hartzea librea eta doakoa izango da, baina aurretiaz izena eman beharra dago. 2018/2019 ikasturteko hurrengo saioetako datak eta edukiak hauek dira:

 

  1. Saioa: Maskulinitate berriak alor zientifiko-teknologikoan

Noren eskutik: Sorkin, Alboratorio de Saberes / Jakintzen Iraultegia

Noiz: 2019 urtarrilak 24, osteguna

Ordua: 17:00-19:00

Tokia:  Bilboko Ingeniaritza Eskola, P1G1 gela

 

Izena emateko idatzi info.bilbao(abildua)euskadi.isf.es helbide elektronikora, mezuaren gaian AKTIBISTA ESKOLA adieraziz eta saioan honetan parte hartzeko motibazioa aipatuz.

 

Garapenerako Lankidetzaren inguruko GrALen hausnarketa jardunaldia

Unibertsitatean Garapenerako Lankidetzan interesa eta esperientzia duten ikasle eta irakasle ugari daudela jakitun garenez, baita honen inguruko hainbat gizarte-egituretan ere, ISF-MGIk kolektibo hauen topaketa gune bat bultzatu nahi du bertan unibertsitateko garapenerako lankidetzaren esperientzien elkartrukatzeko.

Horretarako jardunaldi bat antolatu dugu, bertan aurreko kurtsoetan zehar modu aktiboan Garapenerako Lankidetzaren Praktiken Programan eta Gradu Amaierako Lanak gauzatzen ibili diren kolektibo hauetako pertsonak izango ditugularik, esperientziak eta ikaskuntzak elkartrukatuz, eta gomendioei eta helburuei buruz hausnartuz Unibertsitateko Hezkuntza Eraldatzailea sustatzeko ekimenen gisa.

Jardunaldien helburua ekarpen hauek jasotzea izango da, gerora gizarteratzeko, eta horrela ISF-MGI 2006an UPV/EHUko Garapenerako Lankidetza Bulegoarekin estuki koordinatuta, 2014an argitaratu zen ikerketak aipatzen dena [+txosten osoa], hasi zuen prozesuari jarraipena emateko.

Hori dela eta, zuen zain izango gaituzue ondoko toki eta egunean:

Bilboko Ingeniaritza Eskola. I eraikina. P1G1A ikasgela. Azaroaren 30ean, ostirala, 10:00etatik-14:00etara.

Izena emateko idatzi info.bilbao(abildua)euskadi.isf.es helbide elektronikora, mezuaren gaian DEBATE_TFG_CUD adieraziz eta jardunaldi honetan parte hartzeko motibazioa aipatuz.

Aipamen Berezia “No tenemos miedo” El Salvadorreko dokumentalarentzat

Meatzaritza metalikoaren aurkako El Salvadorreko borroka erakustarazten duen “No tenemos miedo” dokumentalak Bilboko “Film Sozialak” Zinema Ikusezinaren Nazioarteko Jaialdian Garapen Iraunkorreko sailean Aipamen Berezia jaso duenez, ISF-MGI-ko kideek El Salvadorreko ADES eta Colectivo de Comunicación Popular, eta La Maraña eta Santa Marta komunitateko lagunek bidalitako esker hitzak ozen adierazi ditugu jaialdiaren bukaerako ekitaldian:

 

Gaurkoan, dokumental hau gauzatzea posible egin duten eragileek meatzaritzarik gabeko lurraldea defendatzearren erail zituzten Dora, Marcelo eta Ramiro gogoratu nahi ditugu. Justizia eta egia eskatzen dugu, eta kapital kriminal, mehatxatzaile eta hiltzailearen aurrean ondasun kolektiboak defendatzen dituzten pertsona anonimo guztiei (eta dokumental honetan parte hartzera animatu direnei) esker on hau eskaintzen diegu.

El Salvadorren, Latinoamerikako herrialderik txikiena, meatzaritza enpresa haundiei garaitu diegu, honek arnasa ematen digu eta herrioi borroketan elkarrekin jarraitzeko arnasa eman behar digu.

Emakumeen eskubideengatik, lurraldearen eta naturaren defentsagatik, herriak entzun, aurrera denok alboan goaz eta.

Borroka globalizatu dezagun, itxaropena globalizatu dezagun!”

 

Hurrengo hilabeteetan dokumental hau El Salvadorren, Euskal Herrian eta munduko beste herri batzuetan ikusteko aukera izango dugu. Adi egon!

 

Festibaleko irabazleen informazio gehiago KCD-ren prentsa oharrean.

Atzerapausoak ur kudeaketa publiko eta komunitarioaren ezarpenean

Azken hilabeteetan atzerapauso ugari bizi izan dira El Salvadorren uraren kudeaketa publiko eta komunitariaren ezarpenerako gizarte mugimenduek 12 urte luzeetan dabiltzan borrokan. Azken urte honetan izandako bozketen ostean eratu den Asanblada Legegilea berriak, 2012 – 2015 legealdian Ingurumen eta Aldaketa Klimatikoaren komisioan adostutako 92 artikulu alboratu, eta uraren lege orokorraren proiektu berri bati ekin dio, oinarrian Enpresa Pribatuen Erakunde Nazionalak (ANEP gaztelerazko siglak) 2017ko ekainean proposatu zuen 5 aulkidun uraren kontseilu zuzentzailea balioztatuko lukeena.

Abuztuaren 30a, San Salvador. Iturria: Verdad Digital

 

Ordu hartan gertatu moduan, ur kudeaketaren aulkien banaketa negoziaketa honek berriro ere herritarren haserrea eragin du. Azken hilabete hauetan gainera jazarpen eta indarkeria kasuak bizi izan dituzte gizarte mugimenduek.

 

Pasadan irailaren 27an burutu zuen Uraren Pribatizazioaren Aurkako Aliantza Nazionalak azken mobilizazioa, enpresa pribatu gremioaren interesek uraren kudeaketaren aulki propioa izan ez dezaten erakustaratzeko milaka pertsona San Salvadoreko kaleetan barrena irten ziren eta 200.000 sinadura aurkeztu zituzten.

Irailaren 27a, San Salvador. Iturria: Uraren Pribatizazioaren Aurkako Aliantza Nazionala

 

Zenbakiak zenbaki, ekintza guzti hauetan errepikatzen diren “Ura ez da saltzen, zaindu eta defendatu beharra dago!” eta “Ura Giza Eskubidea da, ez da salgaia” aldarriekin bat egiten jarraitzen dugu, eta adi jarraituko diogu datozen hilabeteetan gai honek izango duen bilakaerari.

Lankidetzara Sarrera 10. Ikastaroa Donostian

Euskal Herriko Mugarik Gabeko Ingeniaritzak UPV/EHUrekin batera Donostiako Gipuzkoako Ingeniaritza Eskolan Lankidetza eta Giza Garapenerako Teknologiak ikastaroa antolatzen dugu.


Ikastaroaren planteamendua Giza Garapena eta Garapenerako Lankidetzari buruzko oinarrizko elementuak eskaintzea, eta dauden desberdintasunen (baita generoarena ere) eta bai hegoaldean bai iparraldean ditugun arazoen inguruan kontzientzia kritikoa sorraraztea da.

Guzti horretarako Gipuzkoako gizarte zibileko eta lankidetzako erakundeetako pertsona ezberdinak hizlari moduan arituko dira saio ezberdinetan metodologia partehartzaileak eta eztabaidak sustatuz, genero ikuspegia erakustaraziz eta azaltzen diren gaietan sakontzeko material osagarriak eskainiz.

Ikastaroa garapenerako lankidetzari buruzko oinarrizko ezagutzak eskuratu nahi dituen formakuntza ezberdineko pertsona orori dago zabalik. Ikasketa teknikoak egiten ari diren eta beraien Gradu edota Master Amaierako Lana garapenerako lankidetzako proiektu batean egin nahi duten ikasleentzat, bereziki interesgarriak izan daitezkeen saioak izango dira.

Data eta lekua:
X. edizioa hau urriaren 5etik azaroaren 30era burutukoa da Gipuzkoako Ingeniaritza Eskolan!

Informazioa eta izen emateak:
https://euskadi.isf.es/2018donostiikastaroa/?lang=eu

XIX. ikastaroa. Giza Garapenerako Teknologiak

Ingeniería Sin Fronteras País Vasco – Euskal Herriko Mugarik Gabeko Ingeniaritza (ISF-MGI) erakundeak UPV/EHUrekin batera Bilboko Ingeniaritza Eskolan Garapena, Lankidetza eta Giza Garapenerako Teknologiak mintegia antolatzen du Bizkaiko Irakaskuntza Teknikoetan Sentiberatze eta Garapenerako Hezkuntza proiektu baten baitan.

XIX. edizioa hau urtearen azken hiruhilabetekoan burutuko dugu, irailaren 28etik abenduaren 14rarte, ostiral arratsalde guztietan.

Informazio gehiago: https://euskadi.isf.es/19ikastaroa